[ [ ] [ ] [] [] [] [] [] [] [] [] [] [] []
-->

Espéranto Paris Île-de-France

Hejmpaĝo > Agadoj > Ĝemelaj urboj

laste ĝisdatigita je la 10a majo 2022

Ĉiuj versioj de tiu ĉi artikolo : [Esperanto] [français]

Ĝemelaj urboj

Romo kaj Parizo estas ĝemelaj urboj. Romanoj kaj parizanoj kunvenas rete.

Venonta kunveno komence junio 2022.

— 

Sabaton la 7an de majo la ĝemelaj urboj Romo kaj Parizo rete kunvenis. En nia nuna malfacila internacia kunteksto, ni elektis paroli pri interna paco. Ĉu ĉiu devas trovi sian internan pacon por pacigi la mondon ? Jen interesa demando pri kiu ni amike debatis.
Ĝis 15 samtempaj partoprenantoj dividis siajn spertojn pri malstreĉigado de si mem. Pluraj praktikas meditadon, piedpromenadon aŭ vizitas kinejojn. Aliaj parolis pri la malstreĉiga karaktero de kafumado.
Ni eksciis ke ekzistas Esperantligva retejo por lerni kiel mediti, jen ĝia adreso : https://yogaessencerishikesh.com/eo/how-to-start-meditation/
Nia venonta babilrondo okazos en Junio kaj temos pri ĝemelurbaj spertoj !

— 

Sabaton la 5an de marto la ĝemelaj urboj Romo kaj Parizo haltis en Ĉilio. Ĝis 31 homoj samtempe partoprenis en tiu tre agrabla kaj amika babilrondo. Parizanoj kaj Romanoj multe lernis pri Ĉilio kaj ĝiaj klimatoj. Ni eksciis ankaŭ pri la gravaj problemoj ligitaj al trinkebla akvo kiuj pli kaj pli graviĝas ne nur en Ĉilio, sed ankaŭ en Italio aŭ en suda Francio.
Eĉ se temis pri sezonoj kaj organizado de niaj vivoj laŭ la sezonoj, ĉiuj parolemis pri politiko ! Kompreneble la rusa invado en Ukrainion fariĝis la kerno de la lasta parto de nia parolado. Intertempe, ni parolis ankaŭ pri Salvador Allende !
Kiajn viglajn diskutojn ni travivis !

— 

Sabaton la 5an de februaro la ĝemelaj urboj Romo kaj Parizo daŭrigis sian tutmondan turneon per halto en Novjorko. Okaze de tiu babilrondo ni parolis pri literaturo. Ĉiu parolis pri sia lastatempaj legaĵoj aŭ pri siaj preferataj libroj. Gravaj verkoj originalaj aŭ tradukitaj estis menciitaj kaj ili reprezentis ĉiujn periodojn de la Esperanta literaturo.

Ĝis 33 homoj partoprenis samtempe en tiu agrabla babilrondo kiu instigis al ĉiuj kleriĝi pri Esperanta literaturo !

— 

Sabaton la 8an de januaro, la ĝemelaj urboj Romo kaj Parizo denove haltis en Tokio. 25 homoj partoprenantoj parolis pri siaj plej strangaj okazintaĵoj. Ni malkovris belegan papagon kiu ne parolemis al kamerao, ni admiris la belegajn desegnaĵojn de la prezidanto de Tokia klubo Matuki Yosinobu. Ni parolis ankaŭ pri tute malplenaj stratoj en Romo aŭ Parizo kiam io tre grava okazas, spektado de ŝarkoj en kaĝo kaj ŝip-promenado inter glacimontoj ... ne eblas paroli pri ĉio kion ni diris !
Ni esperas, ke tiel bonetosa babilrondo povos denove okazi kun niaj Tokiaj amikoj !

— 

Sabaton la 4an de decembro, la ĝemelaj urboj Romo kaj Parizo vizitis Novjorkon. Tiu haltejo estas la unua etapo de nia turneo sur la amerika kontinento. Ĝis 37 homoj partoprenis en tiu tre agrabla kaj amika babilrondo. Okaze de la baldaŭa Zamfesto, ni parolis pri nia rilato al Zamenhof. Estis interese konstati kiom malsamas tiu rilato ĉe ĉiu. Por kelkaj Esperanto estas amuza hobio, kaj aliaj dediĉis sian tutan vivon al la internacia lingvo kaj idealo de Zamenhof. P-ro Humphrey Tonkin sciigis al ni la historion de la Novjorka Esperanto-klubo.
Ni ĉiuj esperas, ke ni baldaŭ povos denove paroli kune. Ni deziras al vi bonegan Zamfeston !

— 

Sabaton la 6an de Novembro 2021, la ĝemelaj urboj Romo kaj Parizo haltis en la ĉefurbo de Ĉinio Pekino. Ni elektis paroli pri kuirarto, ĉar ĝi gravegas en ĉiuj niaj kulturoj. Partoprenis en tiu babilrondo ĝis 56 homoj samtempe en amika kaj agrabla etoso. Pluraj Ĉinaj amikoj montris al ni per belaj lumbildaroj la diversecon de la Ĉina kuirarto. Niaflanke ni parolis pri la diversaj italaj pastaĵoj, francaj ĉokoladaj kukoj. Alia temo estis kiu kuiras hejme, ĉu pli ofte edzoj aŭ edzinoj. Ni konkludis ke diligenta praktikado lertigas ajnaseksajn homojn !
Tiu babilrondo estis tiel interesa kaj bone preparita ke ĝi daŭris multe pli longe ol kutime. Ni esperas ke ni povos baldaŭ denove paroli al niaj Pekinaj amikoj.

— 

Sabaton la 2an de oktobro 2021, la ĝemelaj urboj Romo kaj Parizo haltis en Seulo. Okaze de tiu dua etapo en nia tutmonda reta turneo, ni malkovris plurajn ŝatokupojn de niaj gastigantoj. Pli ol 40 Seulanoj akceptis nin, tiel ke ni superis nian rekordan partoprenantaron per 68 ĉeestantoj el 8 landoj ! Menciindas ankaŭ la bonega prepariĝo de la Koreaj parolantoj. Ili pretigis belegajn lumbildarojn kaj montris al ni belajn fotojn de sia urbo kaj ĉirkaŭaĵo. Pluraj koreaj amikoj parolis al ni pri monto-grimpado kaj promenado sur la montoj apud Seulo. Tiu rekorda kunveno estis ankaŭ unu el niaj plej agrablaj, ni esperas ke ni baldaŭ povos denove paroli al Seulo.

— 

Sabaton la 4an de septembro, la ĝemelaj urboj Romo kaj Parizo komencis sian tutmondan retan turneon. Tokio estis la unua etapo de tiu virtuala vojaĝo. Samtempe partoprenis ĝis 33 homoj el pluraj landoj, ĉefe Italio, Francio kaj Japanio, sed ankaŭ el Germanio, Britio, Israelo, Hungario, Bulgario, Svislando, Koreio kaj Ĉinio. La partoprenantoj prezentis sin kaj sian rilaton al Esperanto. Ĉiu rakontis al la aliaj kiam li/ŝi eklernis Esperanton kaj kion ŝi/li faras nun por Esperanto. Ni ĝuis bonegan amikan etoson, ni esperas ke ni baldaŭ denove parolos.

En la sama rubriko: